Print Print


حزب التحریر
مطبوعاتی دفتر
ولایه افغانستان
 
ګڼه: ح.ت.افغ ۰۲/۱۴۴۴ پنجشنبه ۱۳ محرم الحرام، ۱۴۴۴هـ ۱۱/۰۸/۲۰۲۲م

مطبوعاتي اعلامیه
په غزني ولايت کې د حزب التحرير يو تن غړی په شهادت رسېدلی دی

﴿مِّنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ ۖ فَمِنْهُم مَّن قَضَىٰ نَحْبَهُ وَمِنْهُم مَّن يَنتَظِرُ ۖ وَمَا بَدَّلُوا تَبْدِيلًا﴾[٣٣:٢٣]

په مومنانو کې ځينې يې نارينه او غيرتي دي چې له الله سره په خپل کړي تړون کې ريښتيني  دي، ځينو له دوی خپل تړون سر ته ورساوه (د شهادت مقام ته ورسېدل) او ځينې يې انتظار کوي او دوی هېڅکله خپل تړون ته بدلون ورنه کړ.

عبد العزيز محمدي چې په غزني ولايت کې د حزب التحرير – ولايه افغانستان فعال غړی و، د سې‌شنبې په شپه د نا معلومو وسله‌والو لخوا په شهادت ورسېد. نوموړی د شپې لخوا له دعوت څخه د کور پر لور روان و، چې نامعلومو وسله‌والو په ډېر وحشت سره د نوموړي لاسونه، پښې او سترګې تړلي او له ربړولو وروسته يې په سترګو کې په مرميو ويشتلی دی.
حزب التحرير – ولايه افغانستان دا وحشيانه او غير شرعي عمل؛ ترور او مرموزه وژنه بولي او بيانوي چې د مسلمانانو د ژوند ساتنه د اسلامي دولت اساسي مکلفيت دی چې د اسلامي نظام په تطبيق سره د مسلمانانو ځان، مال، عزت او مقدسات ساتي او په دې توګه خپل دنيوي او اخروي مسؤليت اداء کوي. خو په هر حال مومنانو له خپل رب سره تړون کړی چې خپل مال، ځان او خپل هر غوره شی د الله سبحانه وتعالی د رضا لپاره د اسلام او د خلافت دولت د حاکميت په لار کې صدقه کوي. حزب التحرير په خپله (۷۰) کلنه فکري او سياسي مبارزه کې ثابته کړې چې پر خپله موخه (د راشده خلافت دولت تاسيس) او دغې موخې ته د رسېدو لپاره پر خپله طريقه (سياسي او فکري مبارزه) ايمان لري، چې هېڅ ډول زولنو، ځنځيرونو، وژنو او ربړونو دغه ايمان نه کمزوری کړی او نه يې منحرف کړی دی او نه به يې راتلونکې کې کمزوری او منحرف کړي. ان شاء الله!
عبد العزيز د حزب التحرير مخلص او فعال دعوتګر و چې د خلافت دولت د تأسيس له لارې د اسلامي ژوند د بېرته راګرځولو لپاره يې خپل ژوند وقف کړی و او په دې لار کې يې نه ستړې کېدونکې هڅې کولې. هغه له الله سبحانه وتعالی سره پر خپل کړي تړون وفا وکړه. نو د حزب التحرير ـ ولايه افغانستان مطبوعاتي دفتر د حزب التحرير ټولو غړو، د اسلام د لارې مبارزينو او ټولو مسلمانانو ته د دې غمجنې پېښې له امله تسليت وايي. الله سبحانه و تعالی ته دعاء کوو چې د هغه شهادت قبول کړي، د هغه کورنۍ او خپلوانو ته ستر اجر او جميل صبر ورکړي او د هغه قاتلين رسوا او ذليل کړي.

د حزب‌التحریر - ولایه افغانستان مطبوعاتي دفتر


   


   ارسال نظر